أي حياة أتعس من حياتك صديقي المعيد, جدٌ واجتهاد وعمل, و من ثم انت الغريب البعيد...
لما بدك تتعين, وراق, وراق, وصور بتصديق و بلا تصديق, اشبك ولو بدك تتعب مو صرت معيد, ما في شي بيجي هيك؟؟
وبعد كذا شهر بدك تتحكل ضريبة انو صرت معيد؟؟
مراقبة, حلقات بحث طلبات غليظة من رئيس قسمك, رصد و امتحانات, مونة من صديقك الدكتور لتصحيح ألف ورقة لا أكثر!!؟؟
و برا الجامعة كمان مانك خالص؟؟
فلان صار معيد, لعمى بالله معيد, نيالو يا عمي عز وجاه وطلاب وطالبات, يا محمد شقد بدو يصير عندو معجبات!!
على حسد وضيقة عين, تلات رباع راتبنا بروح لعند الصيدلية, حب وجع راس, وجع قلب, و شو بعرفني؟؟!!
و لازم تركب تكسي مشان الأتكيت, مو هيك اسمو؟؟ ولازم لبسك شيك؟؟ وقندرتك سوبر ام بوز؟؟
الله يعينك يا راتبي, شو بتقلب كازية؟؟
رفيقك تغالظ عليك وبدو منك عزيمة, وانت بتحلف يمين بدك تدفع مو انت معيد ركن؟؟
كل شي بكومة واجراءات الايفاد بكومة, بعد كل هالخدمات الكبيرة, بدك تبوس الأيادي من أصحاب السمو الموظفين الخالدين في ذاكرة العمل الجاد الصادق ؟؟!!
بدك تتحمل عقدات النقص, يا ربي شو بدي صير لحتى صير؟؟
المهم قرار مجلس القسم, مجلس كلية, بعثات علمية, مجلس جامعة, وزارة اذا كنت بالسليم بدك كمشة أشهر؟؟ّ!!
واكره شي بالدنيا يرجع قرارك, لأنو الموظفة أو الموظف نسيان ورقة صغيرة؟؟
بتيأس و بتموت ألف موتي ومضروب بحجرة كبيرة, انو انت معيد؟؟
و خود على غلاظة و تقل دم, والله نحنا مساكين؟؟
الله فرجها عليك و مشي حالك ياعم اجت الفيزا بعد عناء طويل مع المرض؟؟!!
بتدخل في متاهة الرواتب, والشيك, وأمر الصرف, يالطيف الطف ويا معيد اركض واركض لحتى تلحق تطير بالطيارة؟؟
أحسن شي بفكروك رايح سياحة, وبدك تلم ثروة العمر, بتسافر وبتجيك هم اللغة والسكن, والجامعة والدنيا, وهيك بتكبر 20 سنة برقم قياسي عالمي جديد؟؟
جامعتك بتشيلك وبتزك في اوربا او باي دولة في العالم, وانت عليك تطبش بايديك واجريك مشان لا تغرق؟؟
وهيك منضل عايشين على اعصابنا, تأخر الراتب, الراتب دوبوا يكفي؟؟
واكره شي لما بقلولك دكتور وانت يا حسرة بتكون يادوب ماجستير, لقب دكتور متل الصخرة يلي بتنحط على صدرك, ممكن هو مشجع بس بأحيان كتير بكون مدمر و محطم
المهم بتخلص ايفادك و بترجع دكتور قد الدنيا, بس اسمك معيد عائد من الايفاد, يعني مارح تخلص من هالعقدة لحتى بعد ما بتتخلص
الله يصبرنا يا رب
كلمة أخيرة, الجامعة بتنسى انو انت رح ترجع دكتور و تخدم بلدك, و على طول بفكرن انو رح نصير دكاترة مشان مجد شخصي؟؟
بس والله نحن عمندرس مشان نرجع نخدم جامعتنا و وطنا, والله يقدم يلي في خير..
إلى جميع الأخوة الموفدين احب أنا أذكركم بانكم انتم اخترتم الأيفاد و المعيدية ، هذا اولاً و ثانياً ان معظمكم لا يعود الى الوطن ازا عرض عليه عمل في بلاد الاغتراب ، ف الرجاء عدم المبالغة في وصف مآساتكم ،
تحياتي اخ محمد ومشكور على الكلام الصادق. الله يوفقنا ويقدرنا على الدراسة والمعيدية وهالسوالف التي بدها مجلدات شرح وما تخلص. بس الشي القاهرني انو هالدكاترة ماكانو قبل معيدين ..ماعانو نفس المعاناة...ليش وقت برجع الواحد منهم بدو ياكل المعيد وكل واحد منهن يجر على طرف...الا من رحم ربي! الله يعينا ويرحمنا برحمتوا مو باعمالنااااااااااا!
لوبدي احكي بحكي جرايد وبملي كتب ماعدا انو لماتوصل ع بلد الايفاد شوف المرار ليقبلو يسجلوك بالجامعه بتخلص ماستر دور ع دكتوراهليش حدا سائل لسا ياصديقي ماضربت ع وجع المعيده شو تحكي البنت يلي شبابنا يلي كلن شهامه بطلعو عليها وكانو عم تاكل من راتبهم او كانو هي عدو الهم ومابساعدوها قال انت بنت و انت خترتي تكوني بالغربه تفضلي صيري متل الاجانب واذا ساعدوها خود ذل ماعدا انو المسكينه مابتقدر تتجوز لاني مافي راتب للزوج بس ياترى حدا حس شقد مسحوقه المعيده؟ الله لايسامح كل معيد بيظلم بنات بلدو
والله كل شي حكيته صحيح , بس نسيت شغلتين , الأولى إذا كنت متزوج وبدك تصطحب زوجتك ,بدك تضيع سنة من دراستك بس شغل أوراق هاي الورقة ما هي مصدقة وهاي قديمة بدها تجديد وخذني جيتك , الشغلة الثانية موضوع العسكرية-خدمة العلم- لما ترجع ,يعني تكره الرجعة للبلد لما تفكر انه وراك عسكرية ,ما بعرف انت تخدم الدولة بعلمك لما ترجع الا لازم تضيع سنتين من عمرك وتضيع كل شي معلومات حصلتها بالايفاد وبالاخير مثلك مثل شخص ما معه شهادة سادس , بس على كل حال يا محمد , الحمد لله ,الله يوفقنا ونخلص
تمخض الجهابزة من اصحاب القرار و أتحفونا بقرار خدمة العلم الأخير الذي استثنى الموفدين من دفع البدل و بذلك قد نجحوا في ضياع الاف الدولارات على خزينة الحكومة
يا اخي معك حق بكل كلمة قلتا بس شو بدك بالحكي انت معيد قد الدنيا. الشي الي كتيرين ما بيعرفوه انو الواحد عم بيموت الف موته باليوم ولك يازلمي صرت عم فكر انا ونايم وكل يوم بدعي الف ومرة انو تمر الايام بخير وسلامة وانو اله يصبرنا ويعافينا من شي انفجار دماغي او انهيار عصبي ومتل ما بيقولو هي ح تيجي منين ولا منين بس شو بدك صيت غنى ولا صيت فقر و نيالك انت معيد قد الدنياو عايش ب اوربا
((بس والله نحن عمندرس مشان نرجع نخدم جامعتنا و وطنا, والله يقدم يلي في خير..)) أكيد؟؟؟!!!
والله يا محمد معاناتكم اهون من معاناتي انا صلي سنتين بلا راتب و يارب يحنوا علينا و يمشوا عشان بس ماطلعت على فرنسا لانو معي فيروس كبد و كانوا ما عندهم شغل و لاقوا شغلتي و لهلاء بوسنا الايدين و الرجلين و ماكانوا يحنوا علينا و يخلصونا من الوراق وبعد سنتين من انتظار المعاملة بتنصدم احيانا انها ضايعة و احيانا ضايعة و احيانا .... و الاحلى من هيك بس تسالهم على الاضبارة بقولولك ارجع بعد اسبوع و هيك من سنتين لهلاء بقولولي ارجع بعد اسبوع وما كان هالاسبوع يجي ولابرحموك و لا بخلوا رحمة الله تنزل عليك
يعطيك العافية و من شهر كتبت مقال و ما انتشرت عن نفس الموضوع بس الموفدين و انا مشكلتين ضرب اثنين يعني موفدين و موظفين لصالح الجامعة يعني نرجع ع الوظيفة راتب 10000 ليرة مو بس الراتب مشكلة كمان مدة الخدمة يعني عبودية ع الرسمي بتدرس خمس سنين بيستعبدوك عشرة و هيك العمر بيخلص و براتب يالا يكفي مصروف شخص واحد يعني و الله ما عم قدر ساعد اهلي مثل العالم يعني تكاليف ادوية عالية و كله هذا و لسا لحالي مو مرتبطة كيف بدها تكون الامور اذا في عيلة بس ليش سوريا نيوز تجاهلت مقالتي هل لاني تحدثت عن نظام الاستعباد؟
مقالة اكثر من رائعة توصف المعيد الوفد وصف واقعي جداَ. بس أخي محمد نسيت شغلة انه بالغربة احيانا بطلعك موفدين متلك وبدهم يزلوك لانهم ساعدوك. وبتدخل بدوامة انتظار الراتب و دفع الرسوم ومن جهة تانية دوامة الزواج اذا كنت عزابي متل حكايتي لأنه أصعب الشي بالغربة هي الوحدة .
ينصر دينك,,اخخخخ