أعزائي المشاهدين في الوطن العربي .. يا عرب .. لا بد أنكم و رغم التخلف الذي تعيشونه و كونكم جماعة مستهلكين و لا تنتجون أي منتج له قيمة ...
حتى البترول كان تحتكم و كنتم تتبولون عليه قبل أن تأتي الدول الغربية و تكتشفه لتبدأ مرحلة نهضتكم ..و رغم نسبة البطالة و الفقر الكبيرين في أصقاع الوطن العربي من محيطه إلى خليجه ... و رغم العقلية المتحجرة التي يمتلكها أغلبكم و التي تنعكس على علاقاتكم الدولية و الداخلية و حتى العائلية ... رغم كل ما سبق ... لا بد من وجود بعض الموهوبين الذين سنلتقيهم في برنامجنا هذا ...
و نرحب معكم بلجنة التحكيم .. المذيع ضد الثورة ... و المطربة مع الثورة ... و العميد شبه مصطفى فهمي ...و تهمس ( بس مصطفى أحلى بكتير )...
نستقبل معاً الموهوب الأول ... المحامي اللعوب ... سيدي المحامي ممكن تعرض مواهبك على الشعوب العربية و لجنة التحكيم ...
المحامي :: الحقيقة شغلتي و عملتي هي التحايل على القوانين و اللعب على حبال العدالة و نكش الثغرات للاستفادة من أخطاء المشرعين في تبرئة موكليني ... يعني كل شي مهرب حشيش أو مهرب مازوت أو نصاب أو من هل مهن الشريفة لما بينكمشوا بيكفي يعلملي على الموبايل بيلاقيني مزروع عندو بالمخفر و معي شهود الزور اللي بيشهدوا انو كان سهران عبيسكر معهن وقت حدوث الجريمة ....
المذيعة :: طيب و إذا مسكوه بالجرم المشهود ؟؟
المحامي :: دغري بشكك بقواه العقلية أو انو كان تحت تأثير المخدر أو هيك شي من الطرق اللي صارت معروفة بعد ما نشروها بكل المسلسلات السورية ...
زمور و ضوء أحمر من شبيه مصطفى فهمي
ينظر له المحامي بغضب .. و يقول :: له له له ليش لسه ما شفت كل شي عندي ..
الشبيه :: بدك تعذرني أنا ما بحب العنف و المواهب العنيفة
المذيعة :: لا شك أنك موهوب و لكن اللجنة ظلمتك ... يمكنك أن تشترك معنا في الجزء التاني من البرنامج بعد ما بنغير اللجنة و شكراً لك
والآن الموهوب الثاني ... السيد الوزير ...كيف حالك
الوزير :: ممتاز ... لولا التغيير الوزاري اللي صار من كام يوم
المذيعة :: ممكن تحكيلنا عن موهبتك ؟؟
الوزير :: أنا الوزير اللي بكون مسؤول عن لم المصاري من الناس و التجار و الصناعيين و موهبتي تكمن في اختراع ضرائب و نكش أي طريقة حتى أشلح المواطن المصاري اللي معو حتى الموظف المسكين ما خلص من ضريبة الدخل و الضرائب التانية اللي بتخلليه يطيّر 10 بالمائة من راتبه على الأقل ... و أنا .. أعوذ بالله من كلمة أنا السبب الرئيسي و بمساعدة الفريق اللي معي في غلاء المعيشة من خمس سنين لهلق و غلاء المازوت و البنزين و الزيت و السمنة و الرز و السكر و السيارات و كل شي بيخطر على بالك من سلع أساسية ..و الي دور رئيسي في حصول كل المصايب المالية ... و أنا على أيامي صارت نسبة الضرائب في ميزانية الدولة 67 بالمائة .. و
يقاطعه زمور من المطربة ... تسأل المذيعة .. ليش يا ستنا .. كان ماشي كويس ... ليش الزمور ؟؟
المطربة :: هو لا شك موهوب و لكن في الفترة الأخيرة لاحظنا انو في كتير من اللي هربوا من مصر و تونس و باقي الدول العربية يملكون نفس الموهبة و كانوا سبب في انفجار الناس من كتر الضغط ... برأيي هلموهبة لهل شخص ما بتستاهل انو ينتقل معنا للمرحلة الثانية ..يعني أقصى ما عندو ساواه و ما رح يطلع معو شي جديد .. و خصوصاً انو أكيد ما رح يصير في الوزارة الجديدة ...
المذيعة :: شكراً سيدتي .. بنحترم وجهة نظرك .. و أنت يا سيدي الوزير نرجو لك إقامة طيبة في منزلك و غير مشكور على كل ما قمت به
و الآن الموهوب الثالث .. نقدم لكم الموظف الشريف .... ممكن تحكيلنا عن مواهبك ...
الموظف :: موهبتي هي في الحركات البهلوانية اللي بقوم فيها خلال أيام الشهر لوضع كل قرش في مكانه و حتى يكفينا راتب العشر تالاف ليرة و ما نمد ايدنا للشحادة ...و هي الموهبة بدها مجهود جبار من التنسيق مع اللحام و السمان و جارنا صاحب السوبر ماركت و فاتورة الكهربا و المي و الهاتف و مسحوق الغسيل و باقي الضروريات لي و لزوجتي و تلات ولاد ...
المذيعة :: و كيف عبتكفيك العشر تالاف ليرة يا معلم ...
الموظف :: مين قللك عبتكفيني ... بعنا ذهب المرا ... و بعنا الغسالة و البراد و خللينا حنفية وحدة و لمبة وحدة بالغرفة بالبيت الجديد ...
المذيعة :: والله ... معك تشتري بيت جديد و تدعي الشرف بالوظيفة ...
الموظف :: لا تستعجلي علي ... كان عندي بيت تلات غرف و صالون ورثته عن أبوي ... بعناه و اشترينا بيت جديد غرفة و منافعها ...
المذيعة :: اي هيك معقول ... و الا كنا استبعدناك من المشاركة بالبرنامج ...
زمور من المذيع .... ممكن نعرف سبب زمورك يا سيدي ...
المذيع :: شخص زي ده ممكن يوصل لمرحلة يحرق نفسه ... و يشعل ثورة .... و إحنا مش ناقصنا من هيك نماذج مقرفة ...
المذيعة :: نحترم رأيك ... و تضع رجلها في ظهر الموظف و ترفسه لخارج المسرح ...كرهتنا عمرنا و قرفتنا عيشتنا يا زلمة ... ناقصنا ؟
والآن الموهوب الرابع ... السيد القاضي المرتشي .... أهلاً بك يا سيدي ...
تصفيق حار من الجمهور ....
المذيعة :: ممكن نعرف سبب محبة الجماهير لك ؟؟
القاضي :: باعتبار انو الفقر هو السبب الرئيسي للانحراف و باعتبار انو نسبة الفقراء في تزايد و الطبقة المتوسطة انقرضت ... صار الفقير يقتل و يسرق و ينصب و في تسعين بالمائة ما بينكمش و عشرة بالمائة بيجيبوه لعندي مع السيد الموهوب الأول في برنامجكم فأتفق معه على المبلغ و يدفعه لي و يقسط هو للمجرم بفوائد و أخرجه بكفالة أو أحياناً أبرئه تماماً
المذيعة :: بس هيك حرام يا سيادة القاضي !!
القاضي :: لو كنت بعرف الحرام لما شاركت في برنامجكم هذا
المذيعة :: بس ما عرفنا سبب التشجيع الكبير من الجماهير العربية ...
القاضي :: لأنهم إلا ما يعتازوني في يوم من الأيام و بيعرفوا اني رح طالعهم ... لأني أقلب الحق باطل و الباطل حق و أقل قضية بتروحلها عشر سنين شط و مط و روح و تعا ...
زمور من ثلاثة حكام دفعة واحدة
المذيع :: موهبة ممتازة بس ممكن يبرئ الثوار
المطربة :: موهبة ممتازة بس ممكن يبرئ أعداء الثورة
شبيه مصطفى فهمي :: أنا مو شايف موهبة مميزة لأنو بتوقع نسبة هيك قضاة في تزايد و بعد فترة ما رح تصير موهبة مميزة
المذيعة :: نحترم رأي اللجنة ... و تهمس (( في قريبي ماسكينو في قضية تهريب مازوت ممكن ننقلو لعندك)
القاضي :: قضية تهريب مازوت ؟ .. ما بينحكى فيها .. ابعتيه .. ابعتيه
تصفيق حار من الجماهير و هو يخرج من المسرح
المذيعة :: الموهوب الأخير في حلقتنا .... السيد المخرج التلفزيوني المنحرف ....
ممكن توضحلنا شو موهبتك ؟؟؟
المخرج :: أنا مخرج فاشل بالأساس و لو كنت غير هيك كنتوا شفتولي مسلسلات أو أفلام
المذيعة :: ما فهمنا شي ممكن توضح
المخرج :: شغلي هو الدعاية و الإعلان .... يعني بيجيني تيار .. يقدم لي فيديو مع ... بعض الرتوش بيصير ضد ....صورة تحمل صور و كتابات مع ... أدخلها للمعالجة بتصير ضد .....أو أحياناً ضد بساويها مع ..... و هلكام يوم سوقي ماشي تمام التمام ... و الدفع بالدولار و اليورو و الشيكل ... و الشغل ماشي و مطلوب ... و الزباين و الفضائيات علدور
المذيعة :: نسمع رأيي اللجنة
المطربة :: نعم طبعاً نعم ... و ياريت تعطيني موبايلك حتى تخرجلي كليبي الجديد
الشبيه :: تلاتة نعم
المذيعة :: مبروك التأهل للمرحلة التانية ... بس المرحلة التانية أكيد رح تقلعك الجماهير (( لأنو التصويت و الكلمة الأخيرة لهم ))
و إلى اللقاء في الحلقة الثانية أيها الشعب العربي الطيب اللي بيستاهل مواهب معاكسة للمواهب اللي عرضناها لأن ديننا و أخلاقنا و تاريخنا ورسلنا و أهلنا ما ربونا على هيك مواهب دخيلة و لا بد أن يأتي يوم تصلح فيه شي وزارة جديدة ما أفسدته الوزارات القديمة ...
موهبتك رائعة وياريت المواهب الباقية يلي ذكرتها تنقرض ونخلص منها
عتبي عليك اخي مال لنسيانك اهم شخصين بيربحوا الجائزة بجدارة ومن غير ولا زمور...عضو مجلس الشعب يلي لازم يكون ضمير الامة الصاحي لخدمتها عوضا عن استغلال منصبه لاغراضه الشخصية,ودكتور الجامعة المسؤول عن التعليم الجامعي ادات تطور اي بلد والمسؤول عن انتاج الخبرات والعقول وتحديث المنهاج الجامعي الفايت بالحيط والذي اصبحت معظم مواده عبارة عن منسيات وتاريخ مواد في اوروبة,مالي مسامحك اذا ما حطيتهن بالحلقة الجايي,تحياتي
لا انكر عليك الموهبة و استنكر توقيت النشر
يبدو من تعليقك أنك تحمل على كاتب المقال .. لأسباب مجهولة .. أرجو منك إضافة مواهب إيجابية للشخصيات التي اختارها الكاتب .... و بعدين .. بتعليقك هذا أصبحت الموهوب السادس في مقالة الأخ مالك في موهبة تنفيس المقالات الرائعة ... و لكن موهبتك عكس التيار و ستخرج من الدور الأول ... يرجى محاكمة المقال بموضوعية لتنال الاحترام .. و لكن بتعليقك هذا سقطت كما قناة الجزيرة في مقال الكاتب السابق أو قد تكون واحد ممن ذكرهم في مقالته ...و بانتظار ردك .. دعني أضحك من قلبي على برنامج الأخ مالك محمول صيني و إلى الأمام
إسقاط جميل وهادف... واسمح لي بتعقيب... الموهوبين الأربعة السالفي الذكر, ومعهم الكثير من المنافقين ومعدومي الضمير هم حلفاء في الفساد والإفساد, وبالتالي جميعهم على قدرٍ متساوي مسؤولون عمّا يحدث... ندعو الله أن يعين القائد والشعب على سحق الفساد وأصحابه, وعلى كسر الأيادي الدخيلة المأجورة, وعلى محق المؤامرة وإبطالها...
انت انسان جدا سلبي وما تفكر حالك عم تنقل الواقع الحقيقي انت بس عم تاخدمنو الامور السلبية وتنقلها شوف يا عيني نص الكاسة الملان وحاج بقا تثير الناس بالتوافه مو وقت سيناريوهاتك اوك ووقت بدك تنقل الواقع نقلو بصورتينو الايجابية والسلبية وشكرا
يا مالك صيني ملكت قلوب السوريين الشرفاءبهذا المقال وتستحق اللقب عن جدارةلأنك اضحكتنا وأبكيتنا ويأستنا وأملتنا بنفس الوقت وهذا ما يحتاجه المقال الناجح وما نحتاجه كشعوب إلى صحوة ضمير تبدأ من نفستا ولا تنتهي عند باب المسؤول, برافو ومبروك المركز الأول
كلامك صحيح وخصوصا نسبة الضرايب 67 كتير عجبتني وضربة منيحة وقوية خليني اعطيك بعض المواهب للحلقة الجاية عندك دكاترة الجامعات ومواهبون في ترسيب الطلاب بعض الاطباء والمهندسين والطبيبات في مشافي التوليد الخاصة
الله يرزقك وتجيب نوكيا فنلندي أصلي .. ونصير أخوة بالاسم .. يا قادر يا كريم
كتييييييير حلو ملعوبة
رائعة بتجنن عنجد انك موهوب عم نستنا شو بدك تقدم بالمرحلة الجاية رجاءً جزء تاني