بعد ماصارت الساعة تنتين بالليل وانا
عم حاول نام قررت انو فكر شوي بهالحياة
شو بدي ساوي وشو بدي صير
وقررت اخيرا انو اصير مسؤول كبير ... بس عن السير طبعا مو اكتر
يعني بدي صير مدير السير بسوريا وبوعدكون ببرنامج
رائع من الاعمال وهو:
رح الغي كل الغمازات من السيارات واجبر كل السيارات انو تركب بدلا
منها ايد اصطناعية تنمد من البلور بتأشر على الجهة يلي السائق
حابب يروح عليها
ومو مشكلة اذا انمدت بعد ما راح ورح خلي الشرطة يخلفو كل يلي عندو غمازات بتكسير
سيارتو وسيارة ابو كمان
بدي الغي المرايا الجانبية نهائيا وخلي السيارات تروح وتجي على كيفها
بدي اجبر كل سائقي السيارات العامة بالحاق بركب سائقي التكسي بانون يركبو مراية
بدل المراية يلي قدام وجهون
وبتكون قياساتها متر وربع بالطول وسبعين سنتمتر بالعرض مشان يشوفو كندرة الامورة
يلي بجها تطلع معون ورا
بدي الغي الزفت من الطرقات وزيد الجور وعبيه الطرق مطبات
بدي طبق التجربة اليابانية بانو الغي اشارات المرور بس مو متلون اتكلف
وابني جسور لأ ببساطة رطفي الكهربا عنها
اذا ما قدرت الغي الاشارات رح ركب زمور عند كل اشارة يبلش يزمر لحالو قبل ما تفتح
الاشارة بخمس ثواني
وبوعدكون انو اذا دعمتوني رح خلي الغرب يتحسر وما يعرف كيف يلحقنا بهالتطور
ورح نكون متل العادة نحنا دائما السباقين
وياريت ماحدا يحبطني ويقلي خططك قديمة ومطبقة اساسا
