قد أختلف معك في الرأي لكني على استعداد أن أدفع حياتي ثمناً في حقك في أن تبدي رأيك  ("فولتيير    )

ا رأيي يا بلا !! أنا لويس الرابع عشر مع كل أسف هكذا أصبح حال البعض منا !! والله شو هالحالة كل واحد مفكر حاله مو بس صح و نبي كمان كإن كلامه قرآن كريم!! مو سامع مو شايف غير حاله بإعتقاده رأيه مُنزل ما بيقبل الخطأ ولا التصويب لأن الشمس تشرق كرماله وكمان بتغيب كرماله و هو محور الكون ما في غيره بالميدان وبوطيس المعترك الي عم يصير ببلدنا الحبيب .

ياجماعة أي رأي هو رأي إنساني بيقبل الخطأ و بيقبل الصواب وكمان مفهوم الصح و الخطأ نسبي يعني إذا حاولت تناقش حدا برأيه وعندك وجهة نظر ثانية فجأة و دون مقدمات بجردك من وطنيتك ومن كل قيمك مع العلم أي حوار أو نقاش الهدف منه الإقتناع و ليس الإقناع وشتان بين الإقتناع و الإقناع ولازم نتعلم إذا كنا على خطأ نتقبل الرأي الصحيح....

رحم الله إمرءٍ أهدى الي عيوبي   (  "الإمام علي )

                         "
والموضوع ما بيتوقف على الي عندهم وجهات نظر مختلفة كمان ضمن وجهة النظر الوحدة يعني إذا صح مفهوم  "التقسيم بين موالاة و معارضة  " بنشوف الشوفونية و التعصب ضمن الاتجاه الواحد فعندك الموالي لدرجة القداسة و ما بيقبل يسمع حتى الموالي الوسطي وبيتهمه بالخيانة و العمالة و بطبيعة الحال هو ملكي أكثر من ملك ما بيعترف بوجود أخطاء و فساد و نهب مال عام و رشوة و طبقية المجتمع و سيطرة الفكر الواحد وغياب الحياة السياسية و القائمة تطول مع العلم إن النظام السياسي القائم أشار إلى هذه القضايا في اكثر من منبر إعلامي .

و نفس الشي في عندك المعارض لدرجة الحقد و الكره الأعمى ما بيتقبل الوسطية أبدا وكل معارض عنده وجهة نظر مختلفة هو عميل للمخابرات و مدسوس ودائما عنده مو بس أحكام مسبقة على الأمور حتى النوايا كمان بس بدي إفهم و ين قبول الرأي الآخر يلي هو إحدى أوجه الديمقراطية المزعومة و الموعودة!!

يا إخوان في وجهة نظر ثالثة وسطية بين الموالاة و المعارضة ما حدا بجيب سيرتها هي مع الصح وين ماوجد وضد الخطأ وين ما وجد يعني مو بالضرورة تكون الموالاة لدرجة القداسة العمياء و لا المعارضة لدرجة الحقد الأسود لأن الوطن فوق كل الاستقطابات السياسية و مهما اختلفنا بالآراء و المواقف يجمعنا سماء الوطن كلنا سوريون وكلنا مسؤولون عن أمن و سلامة الوطن و خيره و لابد أن أذكّر كل شخص فينا بمقولة الفاروق ( أخاف أن تزلق قدم شاة في نهرالفرات فأُسال عنها يوم القيامة)