إلى كل إنسان يشعر بأن أمه هي كل الدنيا
بحضنك يا أمي ولادك التمو
ويلي بحضن امو شو بيهمو
بتخايلك بتخايل العصفور
يلي فتح تمو ونطر امو
وامو على حبة قمح بتدور
بتشبع إذا بتشوفها بتمو
أتخايلت فيكي الشمس نار ونور
وكل ما الصبح لولحلها بكمو
بتترك النار بقلبها وبدور
بغزلة خيوط النور بتضمو
أتخايلت فيكي الشاطئ المغمور
وموجي وموجي ولادك اتسمو
بالجزر متل المركب المهجور
وبالمد ع صدرك بيلتمو
أتخايلت فيكي الطيب والبخور
لوما احترق ما بنقدر نشمو
وشمعة بتشرب دمعها بسرور
وقنديل زيت فتيلتو دمو
أتخايلت فيكي الزرع والناطور
تعب وشقي وهم الزرع همو
أتحرم على الناطور زرعوا يزور
أول ما فاح العطر من كمو
الأرض متلك عمرها مندور
لأولادها ل فيها بيهتمو
وعمرك كتاب معنونو بسطور
بعدة وصايا الناس بيهمو
يلي بياكل اللقمة من التنور
من العار لما بيشبع يذمو
ويلي بيشرب من بئر مهجور
لا يردمو ويؤذيه ويطمو
وجارك إذا عليه الزمن بيجور
لا تهجرو خليك من يمو
الإنسان مركب والحياة بحور
شراعو ابن خالو وابن عمو
صادق صديق مهذب وغيور
سرورك الو وهمك سبب همو
العقرب إذا بتعطف عليه شهور
بغفلة عين بيجرعك سمو
وأخر وصية حروفها من نور
قانون وشرع ومنطق ودستور
الإنسان امو همها همو
عاش بكنفها ودمها دمو
وكتبة الحنية على تمو
يا رب لا تحرم حدا امو
