في اشيا كتير بتصير معك أو مع عالم
بتحبا محيطة فيك...اشيا زغيرة بتمرق هيك..بدون ما تلاحظا...اشيا بلحظة حدوثا او
بروتينا اليومي و تكرارا...يمكن ما يكون الا معنى!!!
بس مع مرور الوقت بتصير تفهم...أو يمكن تحس انو هالاشيا كتييير لذيذة و حميمية...
مثلا انو لما امك يوميا بتصحى الساعة تسعة
الصبح...بلا ما تحس بتصير الساعة تسعة كتير غالية على قلبك!!!
أو لما بكون عند امك سكينة فواكة فرنسية غير شكل بتستعملا لكت التبولة و
الفتوش..بتصير هالسكينة تعنيلك اشيا كتير!!!
لما بالشتوية بيطلع على بال امك تخيط جاكيت صوف او كنزة....و كل يوم بآخر
السهرة بس يخلص المسلسل بتكون هيي كمان مخلصة كم او قبة...بتحس انو انتا و
صنارة الخياطة عتاق كتير.... بتحس الصنارة بتعرف عنك كلشي...بتحسا بتقربك
21 آذار كمان هوي من الاشيا اللي بتتكرر كل سنة...صحيح انو هوي ما عم يتغير
و عم يكون دائما عيد أم...بس كل سنة عم يكون الو نكهة غير...الو حميمية من
نوع تاني هالحميمية و الكم الهائل من الحنيّة عم ترتبط بشكل طردي بتقدمك
بالعمر و بظروف التواصل!!!
اي و كمان من الاشيا الزغيرة اللي بحبا انو انا مرة كنت مأعلن افلاسي و
بطريقة او بأخرى قدرت لم 30 ليرة سورية بعيد الام و اشتريت فيها باكيت حمرا
طويلة (حمرا جديدة طبعا) و هديتا للماما!!
يمكن من أحلى وأجمل الاشيا الزغيرة الغالية على قلبي كتير و بحبا جدا
...انو في الزمن القديم زبطت معي و اجيت ببيتنا...خلقت عندكون انتي و
بابا...
كل عام و انتي بألف خير ماما...كل عام و انتي أحلى...أغلى..و أرقى!!!
ماما...انتي أحلى شي صار بحياتي...
ماما...بعيونك ربيعي نوّر و حلي!!!
https://www.facebook.com/you.write.syrianews
