لمين عم أكتب انا ع وراق

السطور المليانة غزل خلصت

وتوقعت بدموع

وتسّكرت بفراق

لمين عم اكتب انا همي

وليش ياوراقي أنا

 بتتحبري بدمي

يا هالمدى الحامل معك هالسطر

العمر ضاق من العمر

ومن الخيانة

تخزّئت الوراق

وتوقعت بفراق

مسافات يا هالطريق

 المتل السطر ممدود

عوراق الدني ماشي

والنقطة فيك سدود

كل كلمة

بتحمل معك مشتاق

وفوق الحرف ضمّة

مخباية للعشاق

لكن لما المطر ينزل ع شكل دموع

بتشتت الكلمة

وبتنتهي الاشواق

وبموتو هالعشاق

وبتهرب الضمّة

وبتنختم الوراق

بكلمة فيها فراق

صعبة الحقيقة

 لما الكذب يهرب

والاصعب لما تفرد هالوراق

بأيدين مجرّحة وتكتب

شوبدي خبرك ياهالسطر

الي ماإلك هامش

وحدي انا عم موت

ووحدك انت عايش

كيف بدي ارسملك حرف مشتاق

والشوق مقتول

 وعلى بحر الورق فايش

ياشط الكلمة الحزينة

جهّزي هالمينا

نعش الحرف جاية

 بمركب اسامينا

لمين عم اكتب

وجرحك انا يا سطر

هربان من عمري

وساكن بورق القبر

ما ضل للعشاق

ما ضل غير فراق

وكلمة حزينة مشتتة

مرميّة فوق وراق