هو ليس السلاح الأمريكي الأستراتيجي
...ولا حدث هيروشيما الكارثي ...ولا حادثة مفاعل تشيرنوبل النووي ...ولا ضرب الغوطة
الكيميائي ...
بل هي كارثة المشهد الدرامي السوري ....هو القاسم المشترك لكل أنواع الدراما
السورية ..تحليل الحمض النووي DNA ...من أسمو بتحس أنو في أنفجار نووي قادم ...
يعني ما ضل غير المسلسلات التاريخية والبيئة الشامية يحطو فيها هالمشهد ...هلق معقول يطلع عصام ومعتز مو ولادو لأبو عصام ...ولي على هالخبرية ...ولي معناتا في جزء جديد من باب الحارة ...والله سعاد الشرني بتعملا ...يلي بتقول لجوزا فشرت ..وبتركب عدسات أسنان من ورا جوزا ...بتعمل أبوا كمان ....
قال كل مابيزعل البطل من البطلة ..بيروح بيصفن شوي بولادو ..وبيحس في شبه مع جارو
أو رفيقو الأنتيم ....مباشرة بيقول لمرتو روحي توضي يامرة ..وبعدا عالمشفى ...وبعد
ما بيتأكد من أنو هدول ولادو مو ولاد الجيران ....تعود الفرحة للبيت وبيعيشو بسعادة
دائمة ..بتحس حالك عمتتفرج على حكايات عالمية ..
كلو كوم و صرخة روح كوم تاني ...3 رباع المشاهد بتتصور بمخبر التحاليل الطبية ..وبتحس
براميل الDNA عتنزل عروسنا ...يعني المسلسل كلو نووي بنووي لدرجة بتحس أمريكا بدا
تفتح باب المفاوضات مع المخرج مشان الحد من استعمال النووي ...وفي حال الفشل رح
تتدخل تحت الجزء السابع من المسلسل ..وبيخلص جزء وبيبدا جزء جديد ..يعني متل
المفاوضات الأمريكية الأيرانية ...
لأ والمؤلف والمخرج بيقولولك هاد واقع والدراما تمثل الواقع .....
.يعني الغريب إذا بدو يفهم الواقع السوري من خلال الدراما السورية ممكن يستنتج
مايلي :
- الجامعة هي مكان للعشق الممنوع والعشق الاسود ..وكل طاولة بالمقصف تضم ذكر وأنثى
- كل بنات سورية نفخ وحقن ووشم ..
- سورية ما فيا غير دكاترة ترقيع ودكاترة تحليل ...الخ
بيخلص المسلسل ...وبتحس روحك عمتصرخ ...بتفتح الفيس مشان تروح عن نفسك شوي ..بتشوف
أخر تطورات النووي بين أحمد عز وزينة وقضية التوم ....وشلون أحمد عز عميهرب من
المحكمة ..وزينة عمتتبلاه للصبي ...بتحس حالك عمتابع (زينة ونحول )..
بس الشي يلي بيجنن أنو هالتحليل بيكشف اذا كان الولاد لأبون ولا لأ ...بس شلون بدو
يعرف الأب أنو هي أمون ولا لأ .....محشش يتساءل ؟؟؟؟
دمتم بخير
https://www.facebook.com/you.write.syrianews
