شخصيات القصة : ديبو: حلاق ونصف فيلسوف.

 أبو العبد : موظف منتوف.

 أبو شادي : بياع تماري بكعك.

 أبو ناجي :شخصية نزلت بالقصة تنفيعة لتعبئة كرسي الحلاق.

 موجة غلاء أبو شادي : بتعرف لك ديبو جاية عبالي غلي سعر التمرية وساويها بـــ 25 ليرة.

 ديبو : وليش بئا؟ أبو شادي : مالك شايف شلون كل شي غليان ...........لك مبارح سمعت بالأخبار أنو برميل النفط صار فوق الـ100 دولار. ديبو: وشو دخلك أنت بالنفط .......لا تكون عم تشغل عربايتك عالكيروسين؟ أبو ناجي : هاهاهاهاها..... أبو شادي : ليش عم تضحك ....شو يعني الكيروسين.......... شغلة بتضحك؟

 أبو ناجي : ما بتعرف شو الكيروسين؟ أبو شادي : لا والله أنا ما بعرف احكي أجنباوي. ديبو : أخي ليش عم تغير السيرة .....السؤال ليش بدك تغلي التمرية.

 أبو العبد : السلام عليكم. ديبو : وعليكم السلام أهلين أخي أبو العبد ....... شو كل هالكياس اللي حاملون. أبو العبد : يا زلمة مو معقول اللي عم يصير أنا بحياتي شفت هيك غلا .........يا رجل نزلت عالسوق لأشتري شوية غراض اسمها الدنية أول شهر حطيت بجيبتي 2000 ليرة وجبت شوية بندورة وشوية خيار وكم كيلو بطاطا وكيلو لحمة وكم شغلة للطبخة ورحت لعند السمان بدي اشتري فوط للصغير .....                        .يا رجل حطيت إيدي بجيبتي طلع معي شوية فراطة........فكرت حالي مضيع المصاري أو شي حرامي سارقهون مني , بس بعد ما حسبتون طلع الحساب مظبوط ...وكلو من هالغلا. ديبو : يعني الغلا سرق مصاريك!!!!!!

 أبو العبد : أي والله, الغلا ما ترك بجيبتي مصاري ليسرقهم الحرامي.

 أبو شادي : شفت لك ديبو .......شفت ليش بدي غلي سعر التمرية .....مو لأني عم شغل العرباية على هادا اللي اسمو كيروسين , بس لأني وين ما رحت عم شوف ا لغلا بوشي. ديبو : لك صرنا إذا البياع ما رفع سعرو منجبلو التموين. أبو العبد : لك الله يكون بعون الفئير. ديبو : أي والله ............الله يعينو...............هو الشي الوحيد اللي عم يرخص هالأيام.