ليلية كان يزورها ... ويتسامروا

صرلو مدة ما مرمغ عطرو عا خدودها , بيلتقوا بس السكوت محاصرن ,,

 كتر ما اشتاقت لسحر صوتو حاولت تتحركشو ,,

 وصار هيدا الحوار بيناتن ,

عجـّقة فْكارْ مْشَربَكي ،،

 حِيــره و قَــلَقْ

 وقْفِتْ قْبالو حِلوِه ،

 متْلا ما انْخَلَقْ

 بـْصدرا ضَجيجْ الرّعد ،،

و هَمْساتا بــَرقْ

و عتــــــابْ بعيونها ،

 بــغنجْ عم ينْدَلَقْ

 _ إنْتَ و أنا كنـــَّا ..

 نـْوعّي الْعَتم يسْــهَـرْ

نـقطف من الشعر

عناقيد حلياني

و نـِعْزمْ نْجوم السّــما

تـَـ بالْحَلا تِسْكَر

كيفْ هَيكْ يا وِلْفي هجَـرْت بسْتاني !!؟؟

 مَحْـــروقْ قلبي كتير من غَدر الْبَشرْ

و جُور الدّني و الظّلم

خَرّسَنْ لْساني

 شَايفْ بعيني

 قَلبْ الْوَطَن مَوجوعْ

مَدبوح بــِموس التّفرِقَة

و مْقَطعة وْصالو

و تجّـــار باعوا حَقّنا و رِضْيوا الخْنوع

باعو قضية شعب ،

و الْحكم استّغلّو

 و تَحْت الحصّار ولاد

بيموتوا جــوع

حصـــار!!....

يا دِلّ لْ بِيجَرب يفكّوا يا دِلّو

لولا كتبتْ ؟

عَ تْيابـِكْ بْتِنْزَل دْموعْ

بْــتِحْرُقْ بَيــــاضْ التَّـــوبْ اللي بجلّو

 تركلي السياسة ،،

و عا عهرها لا تزيد

منْ مَرَارتْها قَـهرْ

يا رفيقي اِكْتـَفينا

 و تــَعا نِشْــرَب غَزَل ,,

 تــــَيْدوب الجليد

وَحْدو الْغَزل من ها لآسى يداوينا

 تــَعـا عاللّس

ناغشني بحكي جديد

و غرقني بشهقة عطر

 تشرح أمانينا

هـُـــــسْ ..

لا تفتحي باب الغوى ع دنان

ما بدي خَلْ كلمتي يجرح الخلان

 خَلّي المشاعر غافية

و الفكر سرحان

عناقيد بجرار الروح

بعدن عم يتعتقوا

و موسم قطاف الحرف بعد ما حان

القلم خاف الغواية تغطى بدفة الدفتر و نام

 و بعدا الورقة سهرانة ناطرة تشرب نبيد