حبيبنا سانتا كلوز ليك يا غالي صحيح انو علاقتنا انا وانت بالمرة مو كويسة ...

-ااا..اي جدبا و عمول حالك مصدوم ومدهوش و متفاجئ...وما بتعرف شو الأسباب..

شو؟ ذكّرك!-

اوك انا اللي بذكّرك.

الموضوع كتير بسيط ...يا اما انت كذاب يا اما البابا والماما كانوا...ممم...كانوا (عم يمزحوا معي ) يعني نوع من الكذب الأبيض...درلي بالك ...الأبيض ها!!..

بس نظرا للمعزّة الهائلة ونظرا للحب الجم ..ركزلي عليها هي (الحبّ الجمّ) ...ايوا... اللي بكنّو للوالدين ..فالبضرورة أنت اللي كذبت عليي مو هنّي..

-لا تقاطعني رجاءا...-

ولك اي...اي يا سيدي عم كيل بمكيالين..اي و عم طلعون متل الشعرة من العجين..و اصبع الاتهام ما راح وجهو غير عليك....منيح هيك؟

لا تضوّجني و خلينا بخضم الموضوع...الله يرضالي عليك..

ولك يا ظالم ...لك 13 سنة من عمري راحت وانا ناطر حضرة جنابك...بمعدل شهرين كل سنة...وبحسبة بسيطة بيطلع معنا انو نطرتك بشكل فعلي شي 26 شهر...ولنكون دقيقين اكتر هدول بيطلعوا سنتين وشهرين..

يا ظالم ...سنتين وشهرين.....من الصبر و الانتظار و الوهم...

-عم تسأل ليش شهرين بالسنة؟-

لك شبك...شهر قبل عيد الميلاد وانا عم نضف بالمدخنة مشان ما يتلوت المانطو الاحمر تبعك يا غنوج انتا...مشان هالدقن البيضة يا كبيرنا ما تتشحور..وبالاضافة للتهيّئه النفسية و الدخول بالحالة و كم الأفكار الهائل اللي كان يا خدني ويجيبني انو شو الهدية اللي بدك تجبلي اياها..هيك اكلتلا القصة شي شهر..

والشهر التاني بيكون هاد يا سيدي بعد عيد الميلاد..شهر الآلام و المعاناة...شهر تضميد الجراح النفسية و الكذب على حالي..وتصديق الكذبات البيض تبع البابا و الماما...انو سانتاكلوز بيكون ليلة الميلاد كتير مشغول و ما بيلحق يوزع الهدايا عالكل بليلة وحدة...وخود كذب على هالمنوال..(ابيض طبعا) وعلى اي اليوم ..وعلى اي بكرا..هيك بيمضى الشهر و نوعا ما بكون شكّزت نفسيتي و نسيت حتى اشعار آخر..

ما علينا...موهون الطامّة التي قسمت ظهر البعير..

يا سيدي ولا هون الشعرة الكبرى!!!

بعد ما صار عمري 13 ربيع ...ربيع ينطح ربيع و بعد ما بلّشت اشفى منك و بعد ما اخدت القرار اللي بنص انو طلّعك من حياتي..

هيك بكل وقاحة وعين جقرة .....

-شو؟ انا قليل ادب؟-اي لاء...يا سيدي انا مو قليل ادب...بس للحكومة أضرار..أأاا..قصدي للضرورة أحكام!!...انا اليوم مقرر بالاجماع انو فش خلئي ...بلا احترام اعمار بلا بطيخ...و بدي احكي وبدك تسمعني.. ولا تقاطعني يا....يا جدو..

ولك كيف الك عين تبعتلكي ابن جيراننا الابله بدالك...ولك آآآآخخخ شو بدي احكي ..يعني لهادرجة شايفني حمار حتى انغش بهالكم قطنة اللي حاططها على وجهو..ولا ببدلة الكاراتيه الساتان الاحمر اللي لابسلي اياها.....واللي بجنن اكتر انو يا محنّك انتا..يا مخضرم ..ما كلنا منعرف انو قياس  خصرك 56 (يخزي العين) ..طب بس فهمني انو ما لقيت غير ابن جيراننا ...ابن جيراننا يارجل..42 .....ولك ايه 42 قياس خصرو ولوووو...ولك كيف زبطت معك!!

وبعدين يا سيدي ما بدي غزلان...يا اخي ابعتوا على بغل.. على وحيد قرن...ولك على حمار....بس مو على موتور...

موتور...لك والله ما بتنبلع...

طب ماشي...لنفرض جدلا انو انا حمار معبّى ببنطلون و قميص و حيلتك الخارقة انطلت عليي..حلو الكلام...

ولك يا ...-ماشي راح اكظموا....لغيظي...وما راح زفّر بالحكي-ولك يا محترم...يعني كلشي في هدايا بالدني ما عجبك تهديني غير دفتر و قلم...

ولك يعني انو انتا عم تجاكرني مثلا؟!

ولّا حبيت تعمل فيني ضرب لئامة؟ ولّا لتكون بدك تحطها بضهر البابا و الماما؟!!

ولك مكل العالم بتعرف ...ولك زود...حتى زود تبع كتاب الانكليزي ..-ما عرفتو؟-ولك زود يا زلمي هاد اللي بيجي زيارة من الفضاء عالارض...حتى هوي بيعرف انو اكتر شغلتين كنت اكرهون بحياتي هني الروضة و المدرسة...

لكن قلم يا ظالم...لاء ودفتر كمان..!!!

على كل هيدي مشكلة شخصية بيني وبينك و ما حدا خصو بالموضوع...

...المهم مو هاد موضوعنا..

انا اليوم قررت اكسر على انفي شوال بصل...واطلب منك واترجاك..وبوس ايديك و رجليك اذا بدك..

بس في الي عندك طلب انساني...

اسمعني منيح لو سمحت...وركّز معي..

عزيزي سانتاكلوز .السنة متل ما بتعرف سوريا جريحة..

السنة اطفال سوريا بأمس الحاجة الك...

بترجاك.. تعى لعنا السنة..تعى ع سوريا...

تعى ارسوم الضحكة عوجوه زغارنا....

تعى امساح الدمعة عن عيون ولادنا...

تعى رجّع البهجة لقناطر دارنا...

تعى...

تعى وحدك..لا تجيب معك هدايا...لا تجيب ولاشي....

هدية وحدة بس... زغار سوريا ناطرينها منك...واذا بدك الصراحة ..كلنا ناطرينها...زغار و كبار كمان..

سانتاكلوز... اهدينا الحب اللي كان غامر قلوبنا..الطمئنينة والسلام اللي كانوا مزينين سما سوريا..

سانتاكلوز...حلفتك بقدسية دم شهداء سوريا الإبطال...رجعلنا سوريا متل ما كانت...

سانتاكلوز.....دخيلك تعى....