بيقولو الصمت موقف ! حلو هالحكي و بالمناسبة كل الناس بتحكي عن أغلبية صامتة بس " متفجرة " بنفس الوقت! يعني بعلم المتفجرات بتصمت بعدين بتنشحن ثم بتحتقن كتير الى حد الانفلاج وبعدين بإذن الله بتنفجر شر انفجار وبتتدافع الجموع الغفيرة بالشوارع مدري بأي اتجاه بس المهم باتجاه ما و بتغيّر ! اي نعم بتغيّر شئ ما ما عاجبها .. بس للصراحة لحد هلق ما شفت الجموع الغفيرة إلا بخطابات الدكتاتوريين العرب وما شفت جموع عربية احتقنت إلا جنسياً وخود على "سكس " وما انفجرت إلا طائفياً وادبح يابو فهد!
لك يل جماعة مين بدّل نظرية الانفجار الخلاقة تبع الشعوب اللي بتغير واقعها المزري وحط بدالها براس الشعوب العربية فيلم سكس وسكين ؟! ولك هلكنا تحليلات كيف انو هالأغلبية الصامتة بس حسمت خيارها يا بيي شو رح تعمل رح تلعن أبو اللي نفضوا يللي رح توقف ضدو وتحسم الصراع و تعيد رسم خريطة سوريا لا بل و المنطقة والعالم.. لك عم إسأل حالي هالقطيع الصامت أيمت رح يحسم أمرو ؟! إذا بعد حوالي سنة ونص والبلد عم ياكل هوا و القتلى صارو بالآلاف و صرنا على شفير حرب أهلية وما عرفت هالأغلبية الصامتة " المتفجرة " تحس ع دمّها وتتلحلح شوي وتقول كلمتها و تحقق " مشيئته" الموعودة لأيمت ؟!
إذاً بيضل عنا الخيار الآخر واللي هوي إنو هالأغلبية متل كل القطعان في هذا
الشرق لا بتكش ولا بتنش يعني عدم المؤاخذة بالمصطلحات العامية " رجل كرسي " أو
" ظفر حصان ! " ناس سمتها الخوف من كل شي واللامبالاة بكل شي ورح يصفقو متل ما
تعودنا لأي طرف بينتصر و " مين ما أخد أمها رح تقلو عمها " .. هاي هيي أغلبيتنا
الصامتة وهاد هوي موقفها و أحلى الحيوانات بالمناسبة هني " الغنم " و أحلى
الأصوات هوي ثغاء الغنم وعالمشفى يابو فهد
