ما بتدخل بأي نقاش سياسي مع أي واحد حتى لو كان أندبوري حقو فرنكين حتى يسألك انت مؤيد و لا معارض ؟! وطني و لا خاين ؟! طبعاً وكل طرف بيفصل الوطنية على مقاسو المؤيد بيشوفك يا إما وطني مرضي عليك متمترس خلف القيادة الحكيمة او انك عميل بتقبض بالشيكل و الدولار و الريــال .. أما المعارض بيشوفك يا أما ثائر متنح مستعد تتحالف مع الشيطان في سبيل إسقاط النظام أو انك شبيح مستفيد وعايش على موائد النظام ! لك قبحتكم
آلهة الذكاء و الخيارات المتعددة معقول مافي براسكم غير هالثنائيات ؟ لك عم اسأل حالي وبنفس الوقت بسألك يا رب العرش العظيم " شو كنت عم تعمل لما خلقت الكائن العربي لحتى مخو ما عم يتحمل أكتر من خيارين : نعم لا .. أبيض أسود .. مع ضد ؟! لمّا فتحت مخو شو زتّيت لحتى عم يخض هيك بشو كنت مشغول ؟!
يعني بفهمك اذا قلتلي كنت مستعجل وما لقيت بإيدك غير صرماية عتيقة فلحشتا براسو ! بس بحب قلك انو الثنائيات ممكن تكون مفيدة بالعلوم بالفيزا بالكهربا سالب وموجب نورت الدنيا بالكمبيوتر عملت ثورة علمية قصة الواحد و الصفر بس يا إلهي بالمخ العربي هالثنائيات ما حصدت غير الموت بالآلاف و الأرواح البريئة كل "ضد" مباح دمو اذا مانك مصدق شوف تاريخ العرب قديش دبحو ببعض بسبب هالثنائيات !
ما عم يقدرو يتحملو يشوفو حدا مختلف لك لا تشوف تاريخ بس دخول على مقطع يوتيوب إذا بيكون عن نوع من الضفادع آيل للإنقراض في مجاهل الغابات الاستوائية بتشوف العربان حولوها لحرب داحس و الغبراء و التهديد و الوعيد بالقصاص و القتل و الانتقام ضد بعض لك حتى التهديدات بتطال هالضفادع البريئة الآيلة للانقراض ما قادرين يشوفو ضفدع مختلف عنهن ! بقى الله يخليك رجاع فتاح مخو لهالكائن شيل الصرماية وحط محلها لوحة خيارات متعددة ثبتها منيح بشي مطرقة والمسامير عليي أنا وضل اضروب وقوي قد مافينك لحتى تنصلح هالعكفة وتتجلس و إلّا حذفو كلو عن الخريطة لهالكائن وخلي المنطقة العربية محمية طبيعية بتعيش فيها الأنواع المهددة بالانقراض من حيوانات و نباتات بيكون أشرف و أفيد للبشرية و الحضارة الانسانية .....
