•        مرحبا

•        ممممم

•        عبنقول مرحبا

•        آآه  ... إي أهلين

•        لك اشبك يا زلمة مسطول و عينيك حمر متل الدم ... و كأنو فهمك صاير تقيل و كمان سمعك ؟؟؟

•        ابعيد عني ... و اتركني بهمي

•        يا زلمة نحن صحاب .. افتحلي قلبك ... فضفضلي .. ريح فكرك

•        أنا مرضان

•        ممم ... مزبوط ... سمعت انو فيه أمراض متل السكري أو الضغط أو شي متلهن ما بيخللو الواحد ينام

•        بعيد الشر ... ما في شي من هل شي !!!

•        لكن اش مرضك حبيبي ؟؟

•        مرضي صار لي فيه شهرين .... جديد يعني

•        مممم

•        مرضي بتقدر تسميه إدمان ... تعلق ... متابعة ... هيك شي

•        مممم

•        رح تسألني على شو ؟؟؟ .. رح جاوبك ... إدمان على أخبار الثورات .... يا زلمة ما غمضلي عين من وقت أول ثورة لهلق .... كل يوم .. كل صباح ... كل مساء ... على الأكل ... أثناء النوم ...

•        مممم

•        بدك تسألني شلون أثناء النوم ... رح جاوبك ... حطيت تلفزيون في كل غرفة .... في الجلوس .. في المطبخ .. في النوم .. و حتى وقت بدي أروح للتواليت بترك الباب مفتوح مشان أسمع شي خبر عاجل ... و أنا نايم بترك التلفزيون شغال و بنام ... و بتلاقيني اللاوعي عندي و أنا نايم يهزني ليفيقني الساعة تلاتة أو أربعة الصبح على شي موسيقا للجزيرة أو شي نغمة للعربية أو موسيقا الحرة ... أو nbn  أو العالم .. أو غيرها و غيرها ...

•        يا زلمة و الله غيرت تلات أجهزة تحكم بظرف شهرين .... و سألت على ريسيفر تبرمجه على تكرار شي عشرين محطة إخبارية بفاصل زمني نص دقيقة ما لقيت ... على حد علمك في هيك شي ؟؟

•        - ممممم   لأ!!!

•        بس بتعرف و الله زعلان على اليمنيين ... كل ما بصيروا بالواجهة ... في كل قنوات الأخبار ... بتقوم في بلد ثاني و بياخدو السوكسيه منهم ...

•        مممم

•        هداك الاسبوع تعطل الريسيفر لأنو ما تحمل تشغيل مستمر أكتر من شهرين

•        مممم

•        طيارة و اشتريت واحد خلنج ... و ركبتو و أجا الزلمة برمجلي ياه على الترددات الجديدة ...

•        ممممممم

•        الحقيقة كل الثورات بكفة و الثورة الأخيرة بكفة .... هلكتنا تقطيش و تعمية و تشويش و تغيير ترددات و بحث شبكة و ...

•        ممكن أسألك سؤال ؟؟؟

•        اتفضل!!!

•        اش رح تستفيد من متابعة كل هلقنوات و الثورات ..؟؟؟؟

•        له يا زلمة ... هلق بدي أزعل منك ... كلنا رح نستفيد ... رح تقللي شلون ... رح جاوبك ....

•        كل ما بدخل على سيريا نيوز و بقرا خبر عن سحب آلاف السيارات من ماركة تويوتا من كندا أو أوروبا لإصلاح عطل في الفرامل ... أو شركة هيونداي لتعديل نظام القيادة لتسببه في الحوادث في أمريكا ... و شركة مرسيدس تسحب موديل معين لأنه غير متوازن من العالم كله .... إلا وطننا العربي ... كل شركات السيارات يصيبها الرعب عندما يجدون خلل في تصاميمهم و يعتذرون و يسحبون و يعدلون عل نفقتهم الخاصة من كل العالم إلا نحن ....

 يا أخي مو معتبرينا بشر يعني ؟؟؟ لك نحن أكثر شعوب تحب الفنطزية في الموبايلات و السيارات و كل الوطن العربي أكبر مستهلك لسوق السيارات الفاخرة في العالم ... ليش ما بيسحبوا من عندنا تصاميمهم القاتلة و يعدلوها و يعتذروا مننا .... ليش مو شايفينا ؟؟؟ لذلك أملي عندما يجدوا أن الشعوب العربية يمكن أن تثور... يمكن يحسبو حسابنا و يبدو يسحبو من عنا كمان و يضمونا للعالم المتحضر اللي بينحسب حسابو ...

•        ممممم  ... السلام عليكم

•        لك وين رايح

•        رايح أدور على ريسيفر فيو برنامج بيكرر شي عشرين محطة إخبارية بفاصل زمني نص دقيقة  ... يمكن نزلو واحد لاستخدام العالم العربي

•        وينك ... نصيحة اشتري معو خمسة  أجهزة تحكم

•        شكراً