- ياللي مالفضة سبكوكي ومالجوخ الأحمر لبسوكي, وشراشيب الزمرد قبعوكي, عتبي على أهلك بأرخص الأسعار باعوكي. الجواب: (الفجل).
- الله خلق جوّات الأرض شي متل الحجر بياكلو البشر. الجواب( الكمأة).
- شي اسمو على جسمو..... الجواب( البيض).
- شي عضمو من برا وجسما من جوا.....الجواب( البيض).
- جب مكلس مالو باب......الجواب (البيض).
- الجماعة جمعناهن, وفي البيت حطيناهن, البيت انهزم مالطوق والجماعة كمشناهن....الجواب( السمك).
- قبة صفراجواتا سبع تنم أخوة حلوين, مشطح الواحد فوق التاني....( البرتقال).
- مدور متل القمر وخد ملس أحمر وخد مجكجك بالإبر....( القطايف)
- إينا شي حامض بوقت وحلو بوقت وحلال بوقت وحرام بوقت...( العنب)
- بنت أربع سنين جابت أربع أولاد: تنين للجنة وتنين للنار......(للجنة: الدبس والخل, وللنار: العرق والنبيت).
- بيت مدور مالو باب فيه أربع شباب.....( الجوزة).
- شي لابسو أنا بكفوفي وما حدا بقدر ياخدو مني....( الحنة).
- إينا شي ما بتشوفو إلا بالشتا وفروتو من جوا وعمرو مالبسا وفروا لبرّا...(الكستنا).
- أخضر ومدور وسكانو عبيد ومعاشو من الله ومفتاحو حديد....( الجبس).
- ومن النوادر الحلبية: واحد بخيل ساوى حسنة على روح أبوه وأموه وعزم المقريّة( الشيوخ التي تقرأ القرآن), وطبخلن عدس وبصل, وبعد ما خلصت القراية تفضلوا عالعشا, ولمّا تفضلوا, قاللن: أعدسوا وأبصلوا يرحمكم الله.
قام الشيخ الأول و قال: يرحم أبوك اللي كان يطبخ مع الرز دياكا( ديك).
قام الشيخ التاني, وقال: إذا كان هادا عشاكا الله يلحقك بأباكا.
ونظر صاحب العزيمة وقال: بتاكل من هالموجود إلا بعمل هيك وهيك في لحاكا.
بتصرف من كتاب: الكنوز الثرية في المائدة الحلبية, للباحثة: ناديه ياسين سراقبي.
